माणगाव येथे ‘छत्रपती शिवाजी महाराज महसूल समाधान शिबिर’ उत्साहात संपन्न
२,७४८ लाभार्थ्यांना विविध शासकीय योजनांचा लाभ; अनाथ आरक्षणातून पोलीस शिपाईपदी निवड झालेल्या युवकाचा विशेष सन्मान
माणगाव (विशेष प्रतिनिधी): महाराष्ट्र शासनाच्या महसूल व वन विभागाच्या पुढाकारातून जनतेपर्यंत विविध कल्याणकारी योजनांचा लाभ थेट पोहोचविण्याच्या उद्देशाने मंगळवार, दि. २२ जुलै २०२६ रोजी माणगाव येथील ज. गांधी मेमोरियल सभागृहात ‘छत्रपती शिवाजी महाराज महसूल समाधान शिबिर’ उत्साहात पार पडले.
मुख्यमंत्री यांच्या वाढदिवसानिमित्त तसेच माजी उपमुख्यमंत्री स्वर्गीय अजितदादा पवार यांच्या जयंतीचे औचित्य साधून १९३-श्रीवर्धन विधानसभा मतदारसंघात या भव्य शिबिराचे आयोजन करण्यात आले होते.
कार्यक्रमास महाराष्ट्र राज्याच्या महिला व बालविकास मंत्री ना. आदिती तटकरे प्रमुख अतिथी म्हणून उपस्थित होत्या. यावेळी ‘छत्रपती शिवाजी महाराज महसूल समाधान शिबिर अभियान’चे श्रीवर्धन विधानसभा मतदारसंघाचे संपर्क प्रमुख प्रशांत शिंदे यांच्यासह लोकप्रतिनिधी, विविध विभागांचे वरिष्ठ शासकीय अधिकारी आणि मोठ्या संख्येने नागरिक उपस्थित होते.
शिबिरात एकूण २,७४८ लाभार्थ्यांना विविध शासकीय योजनांचा लाभ मंजूर करण्यात आला. त्यापैकी १०६ लाभार्थ्यांना मान्यवरांच्या हस्ते प्रातिनिधिक स्वरूपात लाभांचे वितरण करण्यात आले.
अनाथ युवकाचा विशेष सन्मान
शासनाच्या सूचनेनुसार समाजातील वंचित आणि अनाथ घटकांना प्राधान्याने लाभ देण्याच्या उद्देशाने माणगाव तालुक्यातील ढालघर येथील ओंकार अनिल शिंदे यांना प्रशासनाने तत्परतेने अनाथ प्रमाणपत्र उपलब्ध करून दिले. या प्रमाणपत्राच्या आधारे अनाथ समांतर आरक्षणातून त्यांची मुंबई पोलीस दलात पोलीस शिपाई पदावर निवड झाली. त्यांच्या या यशाबद्दल मंत्री ना. आदिती तटकरे यांच्या हस्ते विशेष सत्कार करण्यात आला.
महसूल विभागाचा सर्वाधिक लाभ
महसूल विभागामार्फत सर्वाधिक नागरिकांना विविध सेवा व योजनांचा लाभ देण्यात आला. त्यामध्ये १,५८८ नागरिकांना जात, उत्पन्न, अधिवास (डोमिसाईल) व इतर दाखले, ३९७ शेतकऱ्यांना ‘जिवंत ७/१२’ मोहिमेअंतर्गत सुधारित सातबारा, ६७ शेतकऱ्यांना ॲग्रीस्टॅक कार्ड, ६१ लाभार्थ्यांना संजय गांधी निराधार योजनेचे मंजुरी आदेश, ५३ कुटुंबांना नवीन रेशन कार्ड, २७ नागरिकांना जन्म-मृत्यू नोंदणीचे आदेश तसेच ३ महिलांना लक्ष्मी मुक्ती योजनेअंतर्गत जमिनीवरील हक्क प्रदान करण्यात आले.
इतर विभागांकडूनही विविध योजनांचा लाभ
पंचायत समितीमार्फत ११ महिला बचत गटांना स्वयंरोजगारासाठी आर्थिक सहाय्य देण्यात आले. शिक्षण विभागाने ११ गरजू विद्यार्थ्यांना शालेय साहित्य वितरित केले, तर ३७ लाभार्थ्यांना घरकुल योजनेचा लाभ देण्यात आला.
तालुका आरोग्य विभागाने २२१ नागरिकांना आभा कार्ड व आयुष्मान भारत कार्ड वितरित केले.
माणगाव नगरपंचायतीमार्फत प्रधानमंत्री आवास योजनेअंतर्गत ६२ लाभार्थ्यांना घरकुल मंजुरी देण्यात आली, तर शबरी आदिवासी घरकुल योजनेअंतर्गत ३५ आदिवासी कुटुंबांना लाभ मिळाला.
एस.टी. महामंडळाच्या माणगाव आगारामार्फत ४८ नागरिकांना एनसीएमसी (NCMC) स्मार्ट कार्ड वितरित करण्यात आले.
तालुका कृषी विभागाने ४६ शेतकऱ्यांना प्रधानमंत्री सूक्ष्म अन्न प्रक्रिया योजना व इतर कृषी योजनांचा लाभ दिला.
भूमी अभिलेख कार्यालयामार्फत ४७ नागरिकांना जमिनीच्या मोजणीच्या सनदा सुपूर्द करण्यात आल्या.
एकात्मिक बाल विकास प्रकल्पांतर्गत ‘लेक लाडकी’ व ‘प्रधानमंत्री मातृत्व वंदन’ योजनेद्वारे २५ माता व बालकांना लाभ देण्यात आला. तसेच ५ लाभार्थ्यांना पूर्वशालेय किट आणि ३ नवमातांना बेबी केअर किटचे वितरण करण्यात आले.
शासकीय योजनांचा लाभ तळागाळातील नागरिकांपर्यंत थेट, पारदर्शक आणि जलद गतीने पोहोचविण्याचा या अभियानाचा उद्देश असून, माणगाव येथे आयोजित या शिबिराला श्रीवर्धन विधानसभा मतदारसंघातील नागरिकांनी उत्स्फूर्त प्रतिसाद दिला.
