प्रतिनिधी माणगाव
“ज्या मातीत आपले बालपण समृद्ध झाले त्या मातीचे पांग फेडणे आणि जन्मदात्या आईच्या वात्सल्याची स्मृती समाजकार्यातून अजरामर करणे, हीच खरी जीवनातील ईश्वरीय पूजा ठरते.” याच उदात्त, कृतज्ञ आणि संस्कारक्षम भावनेचा प्रत्यय रायगड जिल्हा परिषद उत्कृष्ट शाळा उणेगाव येथे नुकताच पाहायला मिळाला. शाळेचे माजी विद्यार्थी, अध्यात्माची नितांत आवड असणारे आणि सध्या मुंबई येथे कर्मभूमी असलेले आदरणीय महिपत सिताराम सत्वे यांनी आपल्या स्वर्गीय मातोश्री वै. गौरीबाई सिताराम सत्वे यांच्या पवित्र स्मृतीप्रित्यर्थ शाळेतील सर्व चिमुकल्या विद्यार्थ्यांना दर्जेदार व देखण्या शालेय दप्तरांचे (स्कूल बॅग्स) अत्यंत आपुलकीने वाटप केले.
आईच्या मायेची ऊब आणि शिक्षणाची गोडी यांचा अनोखा मिलाफ या सोहळ्यात दिसून आला. नवी कोरी, सुंदर दप्तरे हातात पडताच आणि ती पाठीवर चढवताच ग्रामीण भागातील या निष्पाप विद्यार्थ्यांच्या डोळ्यांत एक वेगळीच चमक आणि चेहऱ्यावर कृतज्ञतेचे हास्य फुलून आले. तो आनंद उपस्थितांच्या काळजाला स्पर्शून गेला. याप्रसंगी मनोगत व्यक्त करताना सत्वे भावुक झाले; ज्या प्राथमिक शाळेने आपल्याला घडवले, आयुष्याचा पाया रचला, त्या शाळेचे आणि गावाचे उपकार कधीही विसरता येत नाहीत, असे सांगताना त्यांनी आईच्या स्मृतींना उजाळा दिला. “माझ्या आईचे आशीर्वाद या लहानग्यांच्या पाठीवर सदैव राहतील आणि हीच मुले उद्या मोठे होऊन गावाचे नाव उज्ज्वल करतील,” हा त्यांचा विश्वास उपस्थितांच्या डोळ्यांत आनंदाश्रू तरळवून गेला.
सध्याच्या धकाधकीच्या युगात शहरात राहूनही आपल्या गावाशी आणि मूळ शाळेची नाळ घट्ट जोडून ठेवणारे महिपत सत्वे यांचा हा आदर्श समाजाला नवी दिशा देणारा ठरला आहे. याप्रसंगी शाळा व्यवस्थापन समिती, मुख्याध्यापक आणि शिक्षकवृंदाच्या वतीने महिपत सत्वे यांचा मनःपूर्वक सत्कार करून ऋण व्यक्त करण्यात आले. या भावनिक सोहळ्याला गावातील ज्येष्ठ नागरिक, शाळा व्यवस्थापन समिती अध्यक्ष, उपाध्यक्ष व सदस्य, पालक आणि ग्रामस्थ मोठ्या संख्येने उपस्थित होते. मातृऋण आणि शालेय ऋण एकाच वेळी फेडणाऱ्या या दातृत्वाचे संपूर्ण उणेगाव पंचक्रोशीत भरभरून कौतुक आणि गौरव होत आहे.
